“ပွဲဦးထွက်သီလပွဲလေးပါ”

“ပွဲဦးထွက်သီလပွဲလေးပါ”

==============

ဒုတိယဝါဆိုလဆန်း ၈ ရက်၊ 20.7.2018 ရက်နေ့၊ မနက် ၉း၀၀ နာရီ၊ မန္တလေး၊ မတ္တရာမြို့နယ်၊ ပေါက်ဝဲကျေးရွာ၊ သာသနဝေပုလ္လကျောင်း ဥပုသ်သီလပွဲလေးပါ။

မစိုးရိမ်တိုက်သစ် ဓမ္မသီတဂူကျောင်း နာယကဆရာတော်လေး ဘဒ္ဒန္တကောဏ္ဍညာလင်္ကာရာဘိဝံသ၏ ဇာတိရွာဖြစ်သလို မစိုးရိမ်တိုက်ကြီးကို တည်ထောင်ခဲ့သော အဘိဓဇဆရာတော်ကြီး ဘဒ္ဒန္တသူရိယာဘိဝံသ၏ ဇာတိရွာလည်း ဖြစ်ပါတယ်။

စာရေးသူကတော့ အခုမှရောက်ဖူးတာပါ။ ကျေးဇူးရှင် မစိုးရိမ်ဆရာတော်ကြီးရွာမှာ သီလအနုမောဒနာတရား ဟောကြားခွင့်ရတဲ့အတွက် ဂုဏ်ယူလို့မဆုံးပါဘူး။

မတ္တရာမြို့နယ်ဆိုပေမယ့် ပုသိမ်ကြီးမြို့နယ်နှင့် ကပ်လျက်ပါပဲ။ ရေကြီးချိန်ဖြစ်နေလို့ တစ်ရွာလုံး ရေလွှမ်းနေပါတယ်။

လှေများနှင့်လာပြီး တရားနာယူကြရတာပါ။ စာရေးသူလည်း လှေပေါ်ကဆင်းတာနဲ့ ကျောင်းပေါ်တန်းရောက်ပါတယ်။ အင်းလေးရောက်နေသလိုပါပဲ။ လေတဖြူးဖြူးနဲ့ ဟောလို့လည်းကောင်းပါတယ်။ အပန်းဖြေလို့လည်းကောင်းပါတယ်။

ဗုဒ္ဓအလိုကျ ဥပုသ်စောင့်ပုံစောင့်နည်း ဟောကြားခဲ့ပါတယ်။

ဥပေါသထသုတ္တန်ပါ။

နွားကျောင်းသားဥပုသ်၊ တက္ကတွန်းဥပုသ်တို့ကိုရှောင်ကြဉ်ပြီး အရိယာဥပုသ်ကိုသာ စောင့်ထိန်းကြဖို့ သံပေါက်လေးတွေပို့ချပြီး ဟောကြားခဲ့တာပါ။

လုပ်ဖော်ကိုင်ဖက်လည်းဖြစ်၊ သူငယ်ချင်းလည်းဖြစ်တဲ့ သကျသီဟစာမေးပွဲမှာ တစ်နှစ်တည်း ကျမ်းအတူပြီးတဲ့ ဓမ္မသီတဂူကျောင်းနာယကဆရာတော်လေး ဘဒ္ဒန္တကောဏ္ဍညာလင်္ကာရာဘိဝံသ (ကိုကြီးကွန်း)ကိုယ်တိုင် စီစဉ်ပေးပါတယ်။

ဝီရသူ (မစိုးရိမ်)

25.7.2018