"မနေ့ကလူ"

"မနေ့ကလူ"

=======

ကိုအောင်စိုးကို ဦးဇင်းက ကယ်ခဲ့ရတာပါ။

သူ့ကို ထောင်ဝန်ထမ်းတွေက အနိုင်ကျင့်ကြတဲ့ သတင်းကို အပြင်ထုတ်ပြီး  သတင်းဌာနအရောက်ပို့ပေးခဲ့တာ ကြောင့် ကိုအောင်စိုးကို ထောင်က မတို့ရဲ မထိရဲကြတော့တာပါ။

အဲဒီအချိန်မှာတောင် ကိုအောင်စိုးကို မြင်တောင် မမြင်ဖူးသေးပါဘူး။

နောက်ပိုင်းမှာတော့ ကိုအောင်စိုးက စာရေးသူတို့နေထိုင်ရာ တိုက်ဆောင်ရောက်လာလို့ စားစရာအစ အကုန်ကူညီပေးထားတာပါ။

ထောင်နှင့်ပြဿနာဖြစ်တိုင်း စာရေးသူထံ လာတိုင်ပင်ပါတယ်။ အကြံဥာဏ် အကြိမ်တစ်ရာတောင်းလို့ အကြံဥာဏ်ပေးလိုက်တိုင်း အကြိမ်တစ်ရာ အောင်မြင်ခဲ့ပါတယ်။

ထောင်ထဲမှာ လူတိုင်းနှင့်သင့်မြတ်အောင် ပေါင်းသလို အခုအချိန်ထိလည်း လူတိုင်းနှင့် သင့်မြတ်အောင် ပေါင်းပါတယ်။

စာရေးသူရဲ့ ဆောင်ပုဒ်ကိုက လူမှုရေးမှာ ဟာမိုနီ။ အတွေးအခေါ်မှာ ဂလိုဘယ်လ် ယဉ်ကျေးမှုမှာ လိုကယ်လ် ဖြစ်ပါတယ်။

ကိုအောင်စိုး ထောင်ကလွတ်လာပြီး စာအုပ်ထုတ်တော့ စာရေးသူဆီရောက်လာသေးတယ်။ သူ့စာအုပ်တွေ ရောင်းပေးဖို့လည်း ထားခဲ့သေးတယ်။

သူက ဟိုတယ်မှာ တည်းခိုတာပါ။ စာရေးသူက လက်ခံရင် စာရေးသူဆီမှာ တည်းခိုမယ်လျှောက်ပေမယ့် နေရာအခက်အခဲရှိတာရယ် ထောင်ထဲမှာ တွေ့ခဲ့တာဖြစ်လို့ သူ့အကြောင်းဘာမှ မသိရသေးတာရယ်ကြောင့် ကျောင်းမှာ လက်မခံဖြစ်ခဲ့တာပါ။

အဲဒီတုန်းက သူပြောသွားတဲ့စကား

"ဦးဇင်းကို နိုင်ငံရေးအသိုင်းအဝိုင်းက လက်မခံကြတာရှိသလို လက်ခံတဲ့ပြည်သူတွေလည်းရှိတယ်။ လက်ခံသူက ပိုများလို့ ဦးဇင်းအောင်မြင်တာပါ" တဲ့။

အခုတော့လည်း ကိုအောင်စိုး လေသံတွေက တစ်မျိုးပါပဲ။

ဦးဇင်းလျှို့ဝှက်ချက်ကိုပဲ သိထားသလိုလို၊ ဦးဇင်းကပဲ အပြစ်အကြီးကြီး ပြုလုပ်ထားသလိုပြောနေတာ တွေ့လိုက်ရပါတယ်။

စာရေးသူက ဘုရားလောင်းလောက် သမိုင်းကြောင်းမလှနိုင်ပေမယ့် နိုင်ငံရေးသမားတွေ နိုင်ငံရေးဘုန်းကြီးတွေ ထက်တော့ အပုံကြီးသာပါတယ်။

ကိုအောင်စိုး သိထားတာတွေ လွတ်လပ်ပွင့်လင်းစွာ ဖွင့်ချလိုက်ပါဗျာ။

ထောင်ထဲမှာ ခေတ်စားတဲ့ ထောင်သားတွေရဲ့ ဆောင်ပုဒ်တစ်ခုရှိပါတယ်။

ဒီနေ့ ကျွးတဲ့သူကို ကျေးဇူးတင်ပါတယ်။

မနက်ဖြန်ကျွေးမည့်သူကို ကြိုဆိုပါတယ်။

မနေ့ကကျွေးတဲ့သူကိုတော့ -ီးပဲတဲ့။

ကိုအောင်စိုးအတွက်တော့ ဦးဇင်းက မနေ့ကလူပါဗျာ.........။

ဦးပဉ္စင်း

ဝီရသူ(မစိုးရိမ်)

12.3.2017

PM 10:07

==========================================================

အခုပြဿနာမှာ ဆရာတော်ဦးဝီရသူနဲ့ ထောင်ထဲအတူနေခဲ့ဖူးတယ်၊  တွေ့ဖူးတယ်ဆိုတော့ ထောင်ထဲမှာ ဆရာတော်ရဲ့ စိတ်နေသဘောထားကရော ဘယ်လိုရှိတယ်ထင်ပါသလဲ။

ဟုတ်ပါတယ်။ ကျွန်တော်နဲ့ မန္တလေးထောင်ထဲမှာ အတူနေခဲ့ဖူးပါတယ်။ တွေ့ခဲ့ဖူးပါတယ်။ အဲဒီကိစ္စနဲ့ပတ်သက်လို့ အချိန်မတန်သေးဘူးဗျ။ ဒါပေမဲ့ ကျွန်တော်သိရသလောက်ကတော့ သူကနည်းနည်း အစွန်းရောက်တယ်ပေါ့ ဘာသာရေးအစွန်းရောက်တယ်ပေါ့။ ထောင်ထဲမှာ တွေ့ရတဲ့သဘောထားနဲ့ လက်ရှိဖြတ်သန်းနေတဲ့လုပ်ရပ်တွေက ကိုက်ညီမှုမရှိဘဘူးလို့ သုံးသပ်တယ်။ တစ်ချိန်က သူလည်း ဒုက္ခပေးခံခဲ့ရဖူးတယ်။ အခုတော့ ဘယ်လိုသဘောထားတွေပြောင်းပြီး ဘယ်လိုလျှောက်နေတယ်ဆိုတာတော့ ကျွန်တော်လည်းမသိဘူး။ ထောင်ထဲမှာ ကျွန်တော့်လို လူဆိုးလူမိုက်တစ်ယောက်တောင်မှ ထောင်ထဲမှာ အံတုနေတာ သူကအံတုမနေဘူးဗျ။ ပြေလည်အောင်ပေါင်းပြီးနေတာ ထောင်ထဲမှာက ပေးမှ ကျွေးမှရတာကိုးဗျ။ သူက အဲဒီပုံစံနဲ့ ဖြတ်သန်းတယ်။ သူက ထောင်အာဏာပိုင်တွေနဲ့ ပြေလည်အောင် ပေါင်းသင်းဆက်ဆံခဲ့တာကို ကျွန်တော်မြင်ခဲ့ရတယ်။ ကျွန်တော် ၁၉၉၉ ခုနှစ် လေးလပိုင်းမှာ မန္တလေးထောင် ရောက်ခဲ့တာ။ အဲဒီတုန်းက တိုက်ထဲမှာ ငါးလကျော် ခြောက်လလောက်နေခဲ့ရတာ တိုက်ဖွင့်တော့ အဆောင်ရောက်ပေါ့ဗျာ။ ပိုက်ဆံပေးလိုက်ကမ်းလိုက်တဲ့အခါ ရာထူးလေးရ၊ ပြဿနာတက်တော့ တိုက်ကိုပြန်ရောက်ပေါ့။ အဲဒီမှာ ဦးဝီရသူနဲ့ သွားဆုံတာ။ အဲဒီလိုဆုံတော့ ထောင်အာဏာပိုင်တွေက ကျွန်တော့်ကို ဒုက္ခပေးဖို့ ကြိုးစားတဲ့အချိန်မှာ တွေ့ရတာပေါ့။ ဦးဝီရသူက သူတို့အုပ်စုနဲ့ သူတို့နေတာ။ အဲဒီမှာ ဦးဝီရသူက သူပြောပေးမယ်ဆိုလို့ ထောင်အမှတ်တွေ ဘာတွေပေးပေါ့။ ဦးဝီရသူနဲ့ တိုက်ရိုက်တော့ မဟုတ်ဘူး။ သူတို့အုပ်စုမှာတော့ သူက ဆရာကြီးပေါ့။ သူ့နောက်ကလည်း ထောင်ဝင်စာ ပြည့်ပြည့်စုံစုံလာတဲ့ဒကာတွေက အများကြီးရှိတယ်။ နေတာကလည်း သူ့တပည့်တစ်ယောက်နဲ့ နှစ်ယောက်ပဲ သီးခြားနေတယ်။ ထမင်းပန်းကန် ဆေး၊ ခွက်ဆေး အဝတ်ဘာညာလျှော်ဖို့ပေါ့။ ကျွန်တော်တို့ခေတ် ထောင်ဝတ်စုံအဖြူဝတ်တဲ့ခေတ်၊ ပိတ်ဖြူပတ်ပြီးနေတာပေါ့။ သူက အများနဲ့ ရောရောနှောနှောမနေဘူး။ သီးခြားနေတာ၊ သူ့ပုံစံကြည့်ရတာ အမြဲတမ်း တစ်ခုခုကို တွေးတောကြံစည်နေတဲ့ပုံပဲ။

အခုအချိန်မှာ သတင်းထောက်ကိုဆွေးဝင်းကို ဆရာတော်ဦးဝီရသူရဲ့ တပည့် ကိုကျော်မျိုးရွှေက အမှုဖွင့်တရားစွဲ ထားတဲ့ကိစ္စနဲ့ပတ်သက်လို့ရော ဘယ်လိုမြင်လဲ။

အဲဒီလို အမှုဖွင့်တဲ့ကိစ္စနဲ့ပတ်သက်လို့ ဘယ်လိုမြင်လဲဆိုတော့ သူလုပ်ခဲ့တဲ့ကိစ္စကို သူရက်ပိုင်းအတွင်းမှာပဲ ပြန်ခံစားရပါလိမ့်မယ်ဗျာ။ ဒါက ကျွန်တော်သိထားသလောက်ပါ။ ကိုကျော်မျိုးရွှေလည်း မကြာခင် တရားစွဲခံရတော့မှာလို့ ကျွန်တော်သိထားတယ်။ ဒီကိစ္စနဲ့ပတ်သက်လို့ ကျွန်တော့်အတွင်းရေးကို မပြောချင်ဘူး၊ သိထားပါတယ်၊ ပြောလို့မကောင်းဘူး၊ ကျွန်တော်နဲ့ပတ်သက်တဲ့ ပရဟိတအဖွဲ့တွေရှိတယ်။ သူတို့ ဘာတွေလုပ်မယ်ဆိုတာလည်း ကျွန်တော်သိထားတယ်။

ဒါဆို ဆရာတော်ဦးဝီရသူတပည့် ကိုကျော်မျိုးရွှေနဲ့ပတ်သက်ပြီး ကိစ္စတွေကို သိထားတယ်ဆိုတဲ့သဘောလား။

ကိစ္စမျိုးစုံပေါ့ဗျား။ ကျော်မျိုးရွှေက ဒေါ်အောင်ဆန်းစုကြည်နဲ့ပတ်သက်လို့ ဘာတွေလုပ်ထားသလဲ၊ ဘာပို့စ်တွေ တင်ထားသလဲ၊ ရေးထားသလဲဆိုတာတွေ သူတို့မှာ သက်သေအထောက်အထားတွေ ရှိတယ်။ အဲဒီတော့ ကိုကျော်မျိုးရွှေကို သူတို့ပြန်လုပ်ပါလိမ့်မယ်။