“နိုင်ငံတော်အကြည်ညိုပျက်စေမှုဖြင့် ထောင်ကျခဲ့သည့် ရဟန်းခြောက်ပါး ပြန်လွတ်”

“နိုင်ငံတော်အကြည်ညိုပျက်စေမှုဖြင့် ထောင်ကျခဲ့သည့် ရဟန်းခြောက်ပါး ပြန်လွတ်”

================================================

မန္တလေး၊ စက်တင်ဘာ ၃

အစိုးရကိုဆန့်ကျင်သည့် သပိတ်စခန်းဖွင့်ခဲ့၍ နိုင်ငံတော်အကြည်ညိုပျက်စေမှုဖြင့် ထောင်ဒဏ်တစ်နှစ်ခွဲ ချမှတ်ခံခဲ့ရသော ရဟန်းခြောက်ပါး စက်တင်ဘာလ ၃ ရက်နေ့က အိုးဘိုထောင်မှနေ၍ လွတ်မြောက်လာခဲ့ပြီ ဖြစ်သည်။

၎င်းတို့နှင့်အမှုတွဲတစ်ခုတည်းတွင်ပါဝင်နေပြီး ဖမ်းဝရမ်းထုတ်ခံထားရသည့် ရဟန်းနှစ်ပါးနှင့် လူလေးဦးတို့၏ ဝရမ်းများကို ရုပ်သိမ်းပေးရန် တောင်းဆိုသွားမည်ဖြစ်ကြောင်း လွတ်မြောက်လာသည့်ရဟန်းများက ပြောဆိုသည်။

“ဒီမိုကရေစီအစိုးရဆိုပြီး တက်လာတဲ့အစိုးရက ပြည်သူပြည်သားတစ်ယောက်ရဲ့လွတ်လပ်ခွင့်၊ ဟောပြောခွင့်နဲ့ ရေးသားထုတ်ဝေခွင့်တွေအားလုံးကိုပိတ်ပင်တာဟာ ဒီမိုကရေစီအစိုးရမဆန်ဘဲ စစ်အစိုးရပုံစံဖြစ်နေတယ်။ နောက်ပြီး သပိတ်စခန်းမှာပါတယ်ဆိုပြီး ဖမ်းဝရမ်းထုတ်ခံရတဲ့ သံဃာနှစ်ပါးနဲ့ လူပုဂ္ဂိုလ်လေးဦးကို ၀ရမ်းကနေ ပယ်ဖျက်ပေးဖို့ တောင်းဆိုသွားမယ်” ဟု အကျဉ်းထောင်မှ ပြန်လည်လွတ်မြောက်လာသည့် တောင်သာလေးဆရာတော် ဦးအဂ္ဂဓဇက မိန့်ကြားခဲ့သည်။

၂၀၁၇ ခုနှစ် ဩဂုတ် ၂ ရက်နေ့ကအစိုးရဆန့်ကျင်ရေး သပိတ်စခန်းဖွင့်ခဲ့ပြီး ၅ ရက်နေ့တွင် ဖမ်းဆီးခံခဲ့ရကာ နိုင်ငံတော် အကြည်ညိုပျက်စေမှု ပုဒ်မ ၅၀၅(ခ)ဖြင့် တရားစွဲဆိုခံခဲ့ရပြီး ယင်းနှစ် ဒီဇင်ဘာလ ၂၇ ရက်နေ့က ထောင်ဒဏ် တစ်နှစ်ခွဲချမှတ်ခံခဲ့ရခြင်းဖြစ်သည်။

ထိုစဉ်ကလည်း ချုပ်ရက်များကို ထုတ်နုတ်ခံစားခွင့်ရခဲ့ပြီး ထောင်တွင်းပြစ်မှုမရှိသောကြောင့် လျှော့ရက်ခံစားခွင့်များ ထပ်မံရရှိကာ ငါးလခန့်ကျန်ရှိနေသေးချိန်တွင် ပြန်လည်လွတ်မြောက်လာခဲ့ခြင်းဖြစ်သည်။

ယင်းအမှုတွဲတွင်ပါဝင်သည့် ဦးကျော်မျိုးရွှေကို ပြီးခဲ့သည့် ဇူလိုင်လ ၂၅ ရက်နေ့တွင် ချမ်းမြသာစည်မြို့နယ် တရားရုံးက ထောင်ဒဏ်တစ်နှစ်ခွဲ ချမှတ်ခဲ့သည်။ သပိတ်စခန်းဖွင့်လှစ်ရာတွင်ပါဝင်ခဲ့သဖြင့် ဖမ်းဝရမ်းထုတ်ခံထားရသည့် သံဃာနှစ်ပါးမှာ ဦးစန္ဒာသီရိနှင့် ဦးပဉ္စင်းရခိုင်တို့ဖြစ်ပြီး လူပုဂ္ဂိုလ်များမှာ ဦးမြင့်ဦး၊ ဦးခင်မောင်ကြည်၊ ဂျေကြီးနှင့် ချောစုဝင်းတို့ဖြစ်ကြောင်း ယင်းမြို့နယ်တရားရုံးထံမှ သိရသည်။

သံဃာခြောက်ပါး ပြန်လည်လွတ်မြောက်လာသည့် စက်တင်ဘာလ ၃ ရက်နေ့တွင် မစိုးရိမ်တော်သစ်ရှိ ဆရာတော် ဝီရသူ၏ကျောင်းတွင် အမျိုးသားရေးတက်ကြွလှုပ်ရှားသော သံဃာတော်များနှင့် လူပုဂ္ဂိုလ်များက အခမ်းအနားဖြင့် ကြိုဆိုခဲ့ကြသည်။

M-04

The Voice

4.9.2018