“မြင်းမူ ကျောင်းအပ်ပွဲအခမ်းအနား”

“မြင်းမူ ကျောင်းအပ်ပွဲအခမ်းအနား”

===================

ဝါခေါင်လဆုတ် ၁၂ ရက် (7.9.2018)ရက်နေ့၊ ညနေ ၄း၀၀ နာရီ၊ စစ်ကိုင်းတိုင်း၊ မြင်းမူမြို့၊ အောင်ဇေယျရပ်ကွက်၊ ရေဝန်မင်းသားကျောင်းတိုက်မှာ ကျင်းပပါတယ်။

ရေဝန်မင်းသားဆရာတော်ကြီး ဘဒ္ဒန္တခေမာစာရ (မြို့နယ်သံဃနာယကအဖွဲ့ဥက္ကဋ္ဌ-ရွှေကျင်)က ပဲခူးမြို့ သာမဏေကျော်ပရိယတ္တိစာသင်တိုက် မဟာနာယကချုပ်၊ နိုင်ငံတော်သံဃမဟာနာယကအဖွဲ့ဝင် ဒေါက်တာအရှင်ဝိစက္ခဏာလင်္ကာရာဘိဝံသအား ရေဝန်မင်းသားကျောင်းတိုက်ကြီးကို လွဲပြောင်းအပ်နှံတဲ့အခမ်းအနားပါ။

လွဲပြောင်းအပ်နှံသူ ဆရာတော်အရှင်ခေမာစာရက ကျောင်းထိုင်သက်တမ်း ၃၈ နှစ်ရှိပါပြီ။

သက်တော်လည်းရ၊ ကျန်းမာရေးကလည်းမကောင်း၊ မြင်းမူမြို့ သာသနာအတွက်လည်း ငဲ့ကွက်နေရတာကြောင့် သာမဏေကျော်လေးတွေ မွေးထုတ်ပေးရာ သာမဏေကျော်စာသင်တိုက်အဖြစ် မြင်တွေ့လိုကြောင်း စာရေးသူကို အကူအညီတောင်းလာတာကြောင့် စာရေးသူက နောင်တော်ကြီး အရှင်ဝဏ္ဏသီရိ (သာမဏေကျော်ဓမ္မရိပ်သာ)နှင့်ဆက်သွယ်ပြီး အခုလို စီစဉ်ပေးခဲ့တာပါ။

ပဲခူးမြို့ သာမဏေကျော်စာသင်တိုက်ဆရာတော် ဘဒ္ဒန္တဝိစက္ခဏာလင်္ကာရာဘိဝံသက ၎င်း၏တပည့်နှစ်ပါးဖြစ်တဲ့ ဦးပညာတိက္ခာလင်္ကာရ (သာမဏေကျော်ဓမ္မာစရိယ၊ ဝိနယဝိဒူ၊ ပိဋကတစ်ပုံအောင်)နှင့် ဦးသီလာနန္ဒာလင်္ကာရ (သာမဏေကျော်ဓမ္မာစရိယ B.A)တို့ကို လွှဲအပ်ပေးပါတယ်။

ဒီပွဲကတော့ ဦးပညာတိက္ခာလင်္ကာရ (သာမဏေကျော်ဓမ္မာစရိယ၊ ဝိနယဝိဒူ၊ ပိဋကတစ်ပုံအောင်)နှင့် ဦးသီလာနန္ဒာလင်္ကာရ (သာမဏေကျော်ဓမ္မာစရိယ B.A)တို့က ကျောင်းလက်ခံတဲ့ပွဲပါ။

စာရေးသူကတော့ ပို့မည့်ပို့ ကူးတို့ထိအောင်ပို့မယ်လို့ စိတ်ကူးထားတဲ့အတိုင်း အစစအရာရာ ကူညီဖို့ စိတ်ကူးထားပါတယ်။

ရေဝန်မင်းသားဆရာတော်ကြီး စိတ်ချလက်ချ ခန္ဓာဝန်ချနိုင်အောင် ကူညီလိုက်ရတာကိုပဲ ဝမ်းသာမဆုံးဖြစ်နေပါတယ်။

မြင်းမူမြို့လေး သာမဏေကျော်ကိုရင်လေးတွေ ထွက်ပေါ်လာတော့မှာပါ။

ညီတော်လေးနှစ်ပါး အောင်မြင်ပါစေသော်ဝ်…။